Бычак жеген казак журналисти жандандыруу бөлүмүнөн палатага которулат

Кечээ поездеги кол салууда жаракат алган жарандык активист жана журналист Рамазан Есергепов жандандыруу бөлүмүнөн жалпы палатага которулат.

Жамбыл облусунун саламаттыкты сактоо департаменти Есергеповдун абалы туруктуу экенин жана ал эсине келгенин билдирди. Активисттин жандандыруу бөлүмүнөн жалпы палатага бүгүн кечке чейин которулары күтүлүүдө.

ИИМ Есергеповго кол салуу боюнча иштин тергелиши боюнча комментарий берген жок.

«Оор абалдагы журналисттер» фондунун төрагасы Рамазан Есергепов 14-майда, поезд менен Алматыдан Астанага бараткан маалда бычак жеп, Жамбылдагы ооруканага жеткирилген. Анын кесиптештеринин айтымында, активист Астанага февралда камалган оппозициялык журналист Жанболат Мамайдын жана өзүнүн мурдагы иши боюнча Евробиримдик өлкөлөрүнүн элчилери, ошондой эле эл аралык эксперттер менен жолугушуу үчүн бараткан.

2009-жылы августта жергиликтүү сот Есергеповго карата айыптоо өкүмүн чыгарган. Бирок ал БУУнун адам укуктары боюнча комитетине даттанып, уюм өкүмдү мыйзамсыз деп тапкан. Ал кезде журналист көз карандысыз «Алма-Ата Инфо» гезитинин башкы редактору болуп иштеп келген. Бул талаштуу айыптоо боюнча ал үч жыл абакта отуруп чыккан.

Булак: “Борбор Азия жаңылыктар кызматы”

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *